Job 31

1“Ngasenza isivumelwano lamehlo ami ukuthi angakhangeli intombi ayihawukele.

2Siyini isabelo somuntu asabelwe nguNkulunkulu ophezulu na, ilifa lakhe elivela kuSomandla phezulu?

3Kayisikudilizwa kwababi lokubhujiswa kwalabo abenza okubi na?

4Kanti kaziboni yini izindlela zami abale zonke izinyathelo zami?

5“Nxa ngike ngahamba ngokwamanga loba unyawo lwami lwakhuthalela inkohliso

6akuthi uNkulunkulu angilinganise esikalini sakhe esiqotho ukuze abone ukuthi angilasici –

7uma izinyathelo zami zike zaphambuka endleleni, uma inhliziyo yami ikhokhelwe ngamehlo ami, noma kumbe izandla zami zike zangcoliswa,

8lapho-ke abanye kabazidlele lokho engikuhlanyeleyo, njalo amabele ami kawasitshunwe.

9“Aluba inhliziyo yami ike yakhangwa ngowesifazana, kumbe aluba ngike ngacathama ngasemnyango kamakhelwana,

10lapho-ke owami umfazi kacholele enye indoda, njalo amanye amadoda kawalale laye.

11Ngokuba lokho bekuzakuba lihlazo, isono esifanele ukwehlulelwa.

12Kungumlilo otshisayo onguMaqothula; ngabe kwasiphuna isivuno sami.

13“Uba ngingaphathanga kuhle izisebenzi zami, esesilisa lesesifazana nxa kukhona abakusolayo kimi,

14ngizathini lapho uNkulunkulu esengibuza ngakho na? Ngizaphendula ngithini nxa sekumele ngichaze na?

15Yena lowo owangenzayo esizalweni kabenzanga labo na? Kasuye yini yena kanye owasenzayo sonke phakathi kwezisu zabomama na?

16“Aluba ngilahlele eceleni izifiso zabayanga loba ngayekela amehlo omfelokazi edinwa yizinyembezi,

17aluba ngizidlele ngedwa isinkwa sami, ngingasabelani lezintandane –

18kodwa kwasebutsheni bami ngamondla njengoyise, njalo kwasekuzalweni kwami ngamkhokhela umfelokazi –

19aluba ngike ngabona umuntu esifa ngokuswela izigqoko, loba umuntu oswelayo engelasivunulo,

20njalo inhliziyo yakhe ayingibusisanga ngokumfudumeza ngoboya bezimvu zami,

21aluba ngike ngaphakamisa isandla sami phezu kwentandane, kodwa mina ngikwazi ukuthi bayangilalela emthethwandaba,

22uma kunjalo kayikhumuke ingalo yami kusukela ehlombe, kayephulwe endololwaneni.

23Ngokuba ngesaba ukubhujiswa kukaNkulunkulu, kwathi ngokwesaba inkazimulo yakhe ngayekela ukwenza izinto ezinjalo.

24“Aluba ngifake ithemba lami phezu kwegolide, loba ngathi kulo igolide elicengekileyo, “Ulithemba lami,’

25uma bengithokoziswa yinotho yami enengi, lenzuzo evele ngezandla zami,

26aluba ngilikhangele ilanga libenyezela loba inyanga ihamba ngenkazimulo,

27yaze yayengeka inhliziyo yami ngaphakathi nganga isandla sami ukuzikhonza,

28lezi lazo yizono ebezifanele ukwahlulelwa, ngoba bengizabe ngingathembekanga kuNkulunkulu ophezulu.

29“Aluba ngike ngathokoza ngomnyama owehlele isitha sami kumbe ngagqabhaza ngohlupho olumehleleyo –

30kangivumelanga umlomo wami ukuba wenze isono ngokuqalekisa ukuphila kwakhe –

31aluba abantu bendlu yami bengakaze bathi, ‘Ngubani ongazange azitike ngenyama kaJobe na?’ –

32kodwa kakulasihambi esake salala emgwaqweni, ngoba umnyango wami wawuhlala uvulelwe izihambi –

33uma ngisithukuzile isono sami njengokwenziwa ngabantu, ngokufihla umlandu wami enhliziyweni yami

34ngokuba ngisesaba abantu ngithuthunyeliswa yikweyiswa ngabosendo ngazithulela ngaze ngala lokuphumela phandle.

35(“Kungathi ngabe ukhona ongizwayo! Sengisayina incwadi yokuzivikela kwami – uSomandla kangiphendule; ongimangalelayo kabhale phansi icala angethesa lona.

36Leyoncwadi ngingayithwala ehlombe lami, ngingayithwala ekhanda njengomqhele.

37Bengingamchazela ngokugcweleyo ngazo zonke izinyathelo zami; ngisondele kuye njengenkosana.) –

38“nxa ilizwe lakithi lingiphika lemifolo yalo imanzi ngezinyembezi,

39uma ngike ngadla izithelo zalo angaze ngabhadala loba ngephula imimoya yabantu abahlala khona,

40nxa kunjalo kakumile ameva esikhundleni sengqoloyi, lokhula esikhundleni sebhali.” Aphela lapha amazwi kaJobe.